Махамбеттің жебесі

Әнуар Әлімжановтың «Махамбеттің жебесі» романы халық батырлары Исатай мен Махамбет бастаған көтерілістің жай-күйін сөз етеді. Онда қазақ халқының тарихындағы айрықша әлеуметтік мәні бар оқиғалар бейнеленген. Автор зұлымдық пен зорлыққа қарсы бітіспес күрестің аянышты халін, осы жолдағы халық пен ақынның ерлігін шынайы суреттейді. Романда суреттелетін бар оқиға Махамбет өмірімен тығыз байланыста көрініс береді. Отаршылдық саясаттың күшеюі, жергілікті феодалдардың еңбекші бұқараны аяусыз қанауы өршіп тұрған тұстағы халқының қасіреті мен әлеуметтік теңсіздікті ақын сергек жүрегімен егіле сезінеді. Жазушы ХІХ ғасырдың бірінші жартысындағы Бөкей ордасындағы қайшыласқан әлеуметтік ахуалды нанымды көрсете білген.
Кітап көпшілік оқырманға арналған.