Татар жазушысы Гүзел Яхинаның бұл романы – өткен тарихымыздағы әлі күнге дейін айтылмай жүрген ащы шындықтың бетін ашып, бүгінгі және кейінгі ұрпақ білуі тиіс ақиқатты айта білген туынды.
1930 жылдары кулак ретінде Сібірге жер аударылған, тар кезеңде тағдырлары тоғысқан сан алуан жан өлім мен өмір беттескен сәттерде тірі қалу үшін бірлесе күреседі. Рух қайсарлығы. Жүрек жылуы. Ана махаббаты. Романның бас кейіпкері Зүлейха осы қасиеттерінің арқасында тағдыр сынағынан сүрінбей өтеді. «Қайткенде адам қалады адам болып?». Психологиялық иірімдерге бай роман оқырманына осындай сұрақ қояды. Ой тастайды.
Гүзел Яхинаның тырнақалды туындысы – «Зүлейханың оянуы» романы әлемнің 30 тіліне аударылды. «Үлкен кітап», «Жыл кітабы», «Ясная Поляна», «Оқырман жүлдесі» атты әдеби сыйлықтарға ие болды.
«ЛитРес» компаниясы құрамына кіретін MyBook кітап сервисі Ресей жазушыларының 1992 жылдан бергі уақытта жарық көрген ең танымал көркем туындыларының көшін Гүзел Яхинаның «Зүлейханың оянуы» романы бастап тұрғанын анықтады.
Шығарма желісі бойынша көп сериялы фильм түсірілді.
